BA...BAI-10.egunpasa

15 BA..BAI kide batu ginen atzo gure 10. topaketa egunean, beste 4k ezin etorria agertu eben; hauek izan ginen batutakoak: Josune, Juanita, Maria Luisa, Karmelo, Ani, Marije, Juan Kruz, Fernando Bilbao, Mari Jose, Mari Karmen, Maribi, Jose Luis, Jon Enbeita, Agustin eta Jon Etxebarria.

Hamabietan Auzokoa taberna aurrean alkartu eta, mahai baten inguruan jarrita tragotxo bana hartuz, kontu kontari egotalditxoa egin ondoren, Arrien tabernara joan ginen. Hango arkupean be patxadaz jarrita beste egotalditxo bat egin eta gero Muxikako Kolakaine txokora abiatu ginen ordu biak inguruan.

Han batzuk entsalada prestatu eta makailoa berotzen eben bitartean (Juanita bazkidea buru zala), beste batzuk mahaiak egoki ipini eta haiek hornitzeari ekin geuntsan.

Gero mahaiaren inguruan zutunik topa eginez  (Euskeraz bizi ta tinko / hango eta hemendiko / topa dagigun eta bakean / bizi gaitezen betiko) emon geuntsan hasiera bazkariari: entsalada, makailoa (pil-pilean eta Bizkai erara), errioxar ardaua, mahatsa eta kafeak. Guzti honeri, bakoitzak gainezka geunkan umore ona eta alkarregaz ondo pasatzeko gogoa gehituz, dana konpleto: berbea ugari izan zen gure artean, umorea, ironia eta seriotasuna txandakatuz.

Jan bitartean bakoitzak bere ingurukoekaz ekin eutsan berbaz eta berbaroa etenbakoa eta animatua izan zan. Gero kafeak eta txupitoen batzuk hartzen genituen bitartean gai potoloagoak izan genduzan berbabide; batzuk aipatuko dodaz hemen, interesgarriak iruditzen jatazalako eta guztiotan izan direlako protagonista lagunarte honetako bat edo beste. Beste kontu interesgarri batzuk be izango ziren, seguru; baina nire ahalmena ez da iristen hurrunago.

- Marivik Muxikako San Romaneko dorretxeari, Urkietako arteari eta Ugarteko San Bizente elizari buruzko informazioa banatu euskun.

- Seber Altube ikastolaren hasierako gertaera batzuk kontatu ebazan Josunek.

- Gure ume eta gazte denboran hemengo gerrari buruz izan gendun informaziorik eza komentatu zan; bertan hainbeste sufritu eben gurasoek ez euskuen ia ezer kontatzen. Zergatik?

- Euskera Madrilen kontrolpean badago, ez dagoela zereginik esan zuen batek;  beste batek gure kontrolpean ere badagozala gauza batzuk. Independentzia lortzeak ez dakar euskera salbatzea, nahiz eta lagundu leiken; Irlandan gaelikoaren kasua aipatu zuen batek.

- Euskeraren aldeko borroka besteen kontra edo norberarenaren alde egin daiteke; besteenaren kontra egiteak besteak txar egiten ditu. Guk ez daukagu erderaren kontra ezer, baina euskeraren alde egiteak, besteen kontra egitera eroaten gaitu batzutan.

- Batzuetan jendeak, esaterako ikasle gazteek, hizkuntzak nahastu egiten ditu (euskeraz esaldi batzuk, erderaz beste batzuk). Hori gertatzen da ingurune batzuetan euskeraz egiten dabelako eta beste batzuetan erderaz (familian, lagunartean, unibertsitatean…). Hizkuntza bat baino gehiago jakitea aberasgarria da, baina une bakoitzean ze hizkuntza erabiltzen den jakitea litzateke kontua eta ez dana nahastatzea. Hori nagusiagoei ere gertatzen jaku; lanean gazteleraz egiten bada, laneko gaiak urtetzen direnean hizkuntza horretara jotzen dogulako; esaterako, matematikako eragiketak eta zenbakiak erderaz esateko joera dogu, holan ikasi gendulako.

- Euskara abertzaletasunagaz lotzea ez dala komeni esan zan, herri osoaren altxorra dalako; euskerak politikaren gainetik egon behar duela

- Jose Luisek esan zuen behin irratiako tertulia batean entzun zuela euskerarentzat garrantzitsuagoa zela ergatiboa ikurrina baino; orduan batek esan eban ergatiboa gure hizkuntzagaz zuzen zuzenean dagoala lotuta eta ikurrina politikagaz.

- Kike Amunarrizek euskararen etorkizunari buruzko alkarrizketa batean aipatzen eban paradigma aldaketaren beharrizanaz ere egin zan berba: 80ko hamarkadan euskera ikasteak berarekin erabilera ekarriko zuela uste zala, baina horrek huts egin duela eta gaur egun batez ere erabilpena (erabilpen eskasa) dala kezka eta horri  aurkitu behar deutsagula irtenbidea. 

- Uda honetan Berrian agertu ziren euskerari buruzko elkarrizketetan euskeraren arnasguneak (UEMA, gurea bezalako taldeak….) ere aipatzen ziren eta horretaz ere egin gendun berba. Esaterako, herri eta hirigintza plangintzak egiterakoan euskeraren egoera, ekologia eta beste arlo batzuk lez, kontuan hartzeko joera indarra hartzen ari dala esan eban batek.

- Euskera salbatu daiten euskera egin beharra larregi azpimarratzen dala be esan zan, eta gure hizkuntza beste era batera bizi behar dogula, hau da, euskeraz egitean gustura eta pozik  sentituz; ilusioz ikusi behar dogula euskeraren etorkizuna; eta batek esaldi hau bota eban: euskeraz geu gara.

- Euskal produktuak gehiago kontsumitu behar doguz. Gehienbat erderazko telebista ikusten, erderazko egunkariak eta liburuak irakurtzen, erderazko zinema eta antzerkia ikusten…ohituta gagoz gehienok eta ohitura hori aldatzea kosta egiten jaku. Egia esan, sarritan erderazko produkzioa kalitate gehiagokoa da, baina ez beti. Esaterako, Gernikan kalitatezko antzerki lanak emoten dira euskeraz eta oso jende gutxi joaten da hareetara; Hamaika telebista ere kalitatezko telebistatzat aipatu zuen batek; Muxikako andrak antzeztutako antzerki lanaren arrakasta be aipatu zan.

- Euskarazko produktuak kontsumitzeko gaitasunean badauka zer ikusia euskeraz alfabetatuta egoteak ere eta zoritxarrez euskaldun asko analfabetoak gara geure hizkuntzan, erderaz eskolaratu gintuztelako derrigorrez. Ahalegintxo bat bai egin beharko geunke euskeraz alfabetatzen, orduan euskaldun osoagoak izango ginelako eta horrek gure harrotasuna handituko lukeelako.   

Luze ekin geuntsan elkarrizketa horri, eta abesteko astirik be ez gendun izan, orduak aurrera joiazan eta; diru kontuak egin eta hurrengo topaketarako eguna eta lekua erabagi genduzenerako 18:30ak ziren. Hurrengoa be Kolakaine txokoan izango da datorren urteko otsailaren 7an.

Hemen klikatuz, arnasguneei buruz Marivik komentatu zuen artikulua osorik irakurri daiteke.  

http://www.argia.eus/argia-astekaria/2410/hizkuntza-eta-lurralde-antolaketa

Muxikan, 2014ko urriaren 19an 

EUSPOZ-11.egunpasa

2014ko urriaren 7an Loli, Mikel Garmendia, Maialen, Mari Karmen, Mikel Arginarena, Lorea, Pilare, Juan Luis, Gabriel, Tere, Salba eta Ani izan ginen  EUSPOZen 12. egun pasan.

Taldeko batzuk eta Santutxuko beste berbalagun batzuk Euskaltzaindia bisitatu gendun, Aritz gidari gaztearen azalpen zehatz eta argiak jarraituz; tartean azalpen batzuk Xabier Kintana euskaltzainak ere emon euskuzan.

Hasteko euskeraren jatorriari eta historiari buruzko azalpenak izan genduzan, eta gero Euskaltzaindiaren historiari eta lanei buruzkoak; guztia teknologia barrien laguntzaz. Ondoren Azkue liburutegia eta Euskaltzaindiaren historian garrantzitsuak izan diren pertsonaien argazki-margoak ikusteko aukera izan gendun. Liburutegiari dagokionez, Aritzek esan euskun sasoi batean liburutegi nazionala egiteko asmoa egoala, baina gaur egun liburutegi espezializatua eta digitalizatua egitea dala helburua.  

Ordu batak inguruan amaitu gendun bisita eta alboko Argoitia tabernan zeozer hartu ondoren Santutxuko Garoa txokora abiatu ginen. Han entsalada prestatu, odolosteak eta solomoa frigitu eta mahaiak ipini ondoren, jan edanari ekin geuntsan; hori bai, topa egin eta abestu ostean.

Bazkari denboran eta ostean be kontu ugari izan ziren gure artean; batzuk aipatuko dodaz hemen, interesgarriak iruditzen jatazalako eta guztiotan izan direlako protagonista lagunarte honetako bat edo beste. Beste kontu interesgarri batzuk be izango ziren, seguru; baina nire ahalmena ez da iristen hurrunago:

- Logroñoko taberna bateko mahai baten sei euskaldun eta ondoko beste baten bikote bat suertatu ziren; seikoteak euskeraz egiten ebala eta, ondoko batek besteari “nos están provocando” esan eta beste toki batera alde.

- Kotxe tailer bateko ugasabak (euskalduna bera, baina beharginak ez) nobia euskalduna hartu behar ebala esan eutsan gure taldeko bati. Zergaitik? Kotxea konpontzen joaten zirenak alde egiten ebelako, tailerrean euskeraz ez eutsela egiten eta.   

- Bilboko denda baten euskeraz eskatu eta ugasabak euskeraz erantzun. Orduan bezeroak barriro be joango dala euskaraz atenditzen jarraitzen badau. Besteak harriduraz begiratu eta eskerrak emon eutsozan.  

- Ospitalean egoan neba eta berau haregaz. Euskeraz ebiltzala ikusirik, erizaina (hunkiturik) euskeraz zuzendu jaken eta han beste euskaldun batzuk be baegozala esan; orduan hango euskaldun danak euskeraz.

- Txurdinagako Eroskin euskeraz atenditua izateko hainbat ahalegin egin arren ez eban ezer lortzen. Orduan arduradunari euskaldun lez oso minduta sentitzen zala eta gitxienez euskeraz ekien zerbitzariek txarteltxo bat eroan beharko ebela esan eutsan. Handik aurrera zerbitzari bik edo txarteltxoa jarrita izaten eben.

- Irakasleak ikasle bati euskeraz, beste guztiei lez, baina besteak erderaz erantzun. Halako baten, irakasleak ere zeozer erderaz esan eutsan. Orduan harek aitari hau esan ei eutson: euskera galduta dago, beti euskeraz egiten izan deustan irakasleak be erderaz egin deust eta.

- Udalerri euskaldun batean ordezko medikuak euskeraz ez ekielako, kexua sartu eban batek udaletxean idatziz. Handik gitxira eskualdeko Hitzan udalak be bere kexa adierazi eban, Osakidetzara be bialdu ebala idazti bat esanez. Handik lasterrera ordezko medikuak euskaldunak izan dira herri horretan.      

Honeek eta beste hainbat kontu izan ziren gure artean eta denbora igarri barik joan jakun. Beraz, kantatzeko astirik be ez gendun izan, batzuk bostetarako alde egin beharra izan eben eta. Gero jubilatuak zereginik ez daukiela eta aspertu egiten direla esango dabe. Ea hurrengoan astitsuago ibilten garen eta gure egunpasa atsegin hauek apur bat gehiago luzatzerik dogun.

Hurrengoa datorren urteko urtarrilaren 14an, eguastenez,  egitekotan gelditu ginen; beraz, data hori ipini daigun ondo ikusteko eta gogoratzeko lekuan.

OHARRA: Euskaltzaindiko web gunean hara bisitan joan ginenon argazki hau eta ondorengo aipamena agertzen dira.

Euspoz (Euskaraz pozik) taldeak Euskaltzaindia bisitatu du gaur, urriaren 7an. Euskaraz Bizi lagunarteak ekimenaren barruan kokatzen den Euspoz taldeko kideek Akademiaren nondik norakoa ezagutu dute, Aritz Abaroa Euskararen Herri Hizkeren Atlasa egitasmoko tekinikariak gidaturik. Xabier Kintana Euskaltzaindiko idazkariarekin ere izan dira.

UDALERRI EUSKALDUNEN EGUNA, 2014

Elkarlan hotsak arnasguneetan

Udalerri Euskaldunen Eguna egin dute lehen aldiz, Tolosan.

Arnasguneek euskararentzat duten garrantziaz ohartarazi dute.

Jaurlaritzak neurri gehiago hartuko ditu arnasguneetan.

Elkarlanean, «harremanetan sakonduz» egin nahi dute bidea. Lehen pausoa atzo bertan eman zuten. Adostasun bidearen irudia utzi zuen Tolosako udaletxepeak. Uemako udaletako kideekin batera, ilaran ziren beste erakunde batzuetako arduradunak: Jokin Azkue Eusko Jaurlaritzako Euskara Sustatzeko zuzendaria, Martin Garitano Gipuzkoako ahaldun nagusia, Zigor Etxeburua Gipuzkoako Euskara zuzendaria, Mertxe Aizpurua Udalbiltzako lehendakaria... Euskalgintzako eragileak ere baziren oholtzan: Kontseilua, BERRIA Taldea, AEK, EHE...
Kontuan hartzekoa da Jaurlaritzaren parte hartzea, beti ez baitute harreman erraza izan Uemak eta EAJk. Mezuarekin bat egin du Azkuek: «Lehentasuna da arnasguneak babestea, haietan erabiltzen baita gehien euskara: administrazioan, saltokietan, elkarrizketa informaletan...». Aurreratu du Euskararen Agenda Estrategikoa onartuko duela Jaurlaritzak datorren astean. Neurriak hartuko dituzte arnasguneak sendotzeko.

Flashmob bat egin zuten herritarrek eta agintariek. / GORKA RUBIO / ARGAZKI PRESS

Elkarlanerako deia eta adostasunerako argazkia utzi du Udalerri Euskaldunen Egunak. Izaera zabalagoa emateko asmoarekin antolatu dute aurten egun hori lehenbiziko aldiz, Uema Egunaren ordezko. Euskara indartsuen dagoen herrien topagune izateko nahia zuen, eta haien garrantzia nabarmentzekoa. «Arnasguneek funtzio garrantzitsua dute euskararen iraupenean, eta normalizazioan ere funtzio 

Gehiago: Berria, 2014-ekaina-15
Markina-Xemein eta Berastegirekin, 72 herri dira Ueman

9. EGUNPASA - BA...BAI

12 BA..BAI kide batu ginen aurreko zapatuan: Josune, Juanita, Maria Luisa, Karmelo, Ani, Juan Mari, Marije, Juan Kruz, Fernando Garate, Jon Gorroño, Mari Karmen eta Maribi.

Ordu batetan Auzokoan alkartu, inguru hartan trago batzuk hartuz kontu kontari ibili ondoren, ordu bi eta erdietan geure bazkalekura iritsi ginen, Arizpera.  

Han, mahaiaren inguruan zutunik topa eginez  (Euskeraz bizi ta tinko / hango eta hemendiko / topa dagigun eta bakean / bizi gaitezen betiko) emon geuntsan hasiera bakariari: fritoak, makailoa (pil-pilean eta Bizkai erara), errioxar ardaua, pasteltxoak eta kafeak. Guzti honeri, bakoitzak gainezka generaman umore ona eta alkarregaz ondo pasatzeko gogoa gehituz, dana konpleto: berbea ugari izan ze gure artean, umorea, ironia eta seriotasuna txandakatuz.

Lehendik be geure hizkuntzari atxikimendu handia deutsagula eta euskeraz pozik bizi garela argi gelditu zan; baita be, gehienen iritziz, ondo datorkigula batzen jarraitzea, erretasunetatik irtetzeko, indarrak hartzeko eta elkar animatzeko, besteen bizipenetatik ere ikasiz; gainera ondo pasatzen dogula esan zan; eta gure antzeko beste lagunarte batzuekaz egotea be ondo datorkigula. 
Orain han kontatutako beste kontu batzuk aipatuko dadaz hemen:

- Iparraldetik itzulitako bati egindako harrera dala eta, haren inguruan batutako euskaldun batzuei, erderaz ebiltzalako, gutako batek esandakoa eta horren inguruan izandako alkarrizketa. 

- Pelukerian emakume euskaldun berbati batek erderaz egiten ebala eta, gutako batek euskeraz egingo baleu, euskal giroa sortuko zala esan eta ondoren euskeraz egiten ei dau harek eta beste danak. Holan, hizkuntza ohitura aldatzea lortu zan biei esker. 

- Katalan batzuk egon ei ziran Gernikan euskaldun batzukaz eta batek ea katalanez egin leikien galdetu. Gutako batek: ahal  bakarrik ez, egin beharko zeunke. Orduan berak: zuek euskaldunek euskeraz ez dakien bat taldean egon ezkero erderaz egiten dozue eta.

- Familian euskera ez dakien koineta egoalako-ta, gutako bati bere arrebak erderaz egiteko. Erantzuna: nik horregaitik ez deutset erderaz egingo neure nebarrebei; berari zuzentzen naiakonean, orduan egingo deutsat. 

- Urdaibai kantagunekoen artean ere erdera askotxo entzuten ei da. Horren inguruan be egin gendun berba, talde horretako hainbat dago gure artean eta.

Beste batek esan eban bere behar lekuan danak ekiela euskeraz, baina sarritan erderaz egiten ebela; baina pertsona bat faltatzen zanean euskeraz egiten ebela. Lehen aipatutako pelukeriako kontua barriro be?

- Esan zan baita be, beti gai bardinei bueltaka ibili beharrean, gure historiaz, kulturaz, nortasunaz be egin beharko geunkela berba gure artean; eta horretaz be ekin geuntzan apur bat. 

Gero, orduak aurrera joiazala eta, diru kontuak egin eta hurrengo topaketarako eguna eta lekua erabagi genduzan: urriaren 18an Muxikako Kolakañe txokoan.

Azkenik kantu batzuk abestuz emon geuntzan amaiera gure egotaldi atsegin eta interesgarriari; eta 18:30ak inguruan urten gendun Arizpetik, euskeraz bizitzeko gogoa eta konpromisoa indarbarrituta.

Karmeloren argazki makinari esker hango giro ederra grafikoki ere ederto ikusi eta imajinatu daiteke.

Muxikan, 2014ko ekainaren 12an

Hemen jartzen dodaz Jose Luisek korreoz bidalitako gogoetak ere. Berak ezin izan eban etorri topaketara, baina hartu eban denpora, hau idazteko. Eskerrik asko.

Oso galdera interesgarriak planteatzen dituzu. Izan ere ni beti gustura izan naiz Ba…Bai taldekideekin, berba egiten, iritziak partekatzen, kantuka eta abar. Dena dela jarraitzeko helburua edo helburuak markatu beharko dira. Elkarrekin egonez aparte beste gehigarri bat edo batzuk ipini  beharko ditugu.

Helburua: euskararen erabilpena zelan bultzatu, zabaldu eta lotu beharrezko usadioekin. Hau da, euskarak merezi duen munduaz jabetzeko. Euskara izateak paisai ezberdin batera leihoak zabaltzen dizkigu, edozein hizkuntzak kosmobisio bat dakar eta aberastu egiten gaitu; euskara balioa da.

Animatu euskaraz bizitzeko? Ez bereziki. Ni mugitzen naizen inguruan aukera daukat euskaraz bizitzeko.

Aurrerantzean jarraitzeko, ez dakit, eztabaidatu beharko da. Nik pentsatzen dut aukera litzatekela zerbait komun jarri leiduteko, ikusteko eta elkarren artean komentatu.

       

EUSPOZ- 10. EGUNPASA

2014ko maiatzaren 29an Mikel Garmendia, Arantza, Jose Mari, Marije, Juan Kruz, Maialen, Mari Karmen, Mikel Arginarena, Lorea, Pilare eta Ani izan ginen  EUSPOZen 11. egun pasan. Besteak ezin izan eben etorri. Ea hurrengoan danok batzen garen.

Arriaga plazan alkartu eta Erreixoaren ondotik joan ginen kontu kontari Deustuko Euskararen Etxea bisitatzera. Han Olaiz izan gendun gidari. Hasteko bideo labur bat erakutsi euskun Euskararen Herrian murgiltzeko. Ondoren alboko gelara, nazara, zuzendu ginduzan eta han euskeraren tren biren leihatilak erakutsi eta azaldu euskuzan:

Lehenengo trenean “Euskara, Bat eta Asko” eta bigarren trenean “Atzo eta Gaur”. Benetan ere azalpen interesgarria, irudi dotorez lagunduta.

Handik metroz joan ginen Santutxuko Garoa txokora eta han janariz eta edariz ondo hornitutako mahai karratua izan gendun zain, Santutxuko Euspozkideek maitasun eta goxotasun handiz prestatua: askotariko entsalada, tomate saltsaz eta piper gorriz hornitutako maruka zaporetsua, eta postrerako kerizak eta pastela; hori errioxar ardo ederraz lagunduta, azkenik kafea.  Hori dana eta lagunarte umoretsua, zer gehiago behar da ondo pasatzeko!!

Gainera Mikel Arginarenak bere Neronek Bizi Izandakoa liburua aurkeztu euskun; horrek ikastolen inguruan bakoitzak izandako bizipenak azaleratzeko aukera ere emon euskun.

Pena izan zan denbora igarri barik joan jakula eta Pilareren kopla idatziak kantatu, kontuak egin eta bakoitzak bere zereginetara joan behar izan gendula. Ea hurrengoan astitsuago ibilten garen eta gure egunpasa atsegin hauek apur bat gehiago luzatzerik dogun.

Hurrengoa urriaren 8an egitekotan gelditu ginen; beraz, data hori ipini daigun ondo ikusteko eta gogoratzeko lekuan.    

EUSPOZ TALDEKO  BATZARRA BILBON

2014KO MAIATZA

Bilbo barruan EUSKARA  ETXEA

Euskaldun oro bertoko jabea.

Euskal ondarearen

azalpen ta abaro,

Euskarari babesa

eskainiz oparo.

Bilbo barruan EUSKARA  ETXEA

Euskaldun oro bertoko jabea.

Euskaraz Bizi eta

baita Berbagune,

euskal munduaz goza

gizon emakume.

Bilbo barruan EUSKARA  ETXEA

Euskaldun oro bertoko jabea. 

Euspoz kide jatorrok

zelan bizi gara?

aurpegi  alai asko

ona da islada.

Bilbo barruan EUSKARA  ETXEA

Euskaldun oro bertoko jabea.

Maharen inguruan

hemen bada giro,

ANIk antolatuta

Koodinatu gero.

Bilbo barruan EUSKARA  ETXEA

Euskaldun oro bertoko jabea.

Santutxuko txokoa

Klasiko bihurtu,

Leku zoragarria

Gu gaude kontentu.

Bilbo barruan EUSKARA  ETXEA

Euskaldun oro bertoko jabea. 

Arrain ta entsalada

sabela betetu,

kantu eta kontuak

euskal sentimentu.

Bilbo barruan EUSKARA  ETXEA

Euskaldun oro bertoko jabea.

Eskerrik beroenak

Loli,Mikel Lutxi.

aterpe Ederra ta

plater eta ontzi.

Bilbo barruan EUSKARA  ETXEA

Euskaldun oro bertoko jabea.

Hurrengo bilkuraren

data eta gidoi,

proposamak egin

laguntxuok otoi.

Bilbo barruan EUSKARA  ETXEA

Euskaldun oro bertoko jabea. 

Oraingoan hirian

Bilbo ederrian,

Hurrengoa  agian

Mendi ohianian.

Bilbo barruan EUSKARA  ETXEA

Euskaldun oro bertoko jabea.

Laztan bana denoi

agur ondo bizi,

zuekin izatea

ohore eta grazi. 

PILARE BARAIAZARRA, EUSPOZ TALDEKIDEA

BA...BAI eta EUSPOZ batera

Atzo BA…BAI eta EUSPOZ lagunarteak batera alkartu ginen, guztira 24: Jon Etxebarria, Juanita, Mikel Garmendia, Tere, Maria Luisa, Karmelo, Pilare, Gabriel, Ani, Juan Mari, Mari Karmen Goiriena, Lorea, Marije, Maria Asun, Jon Enbeita, Jose Agustin, Matxalen, Loli, Juan Kruz, Fernando Garate, Jon Bilbao, Jon Gorroño, Mari Karmen Gainza eta Maribi; seik edo ezin izan eben etorri, baina egon ginenok egun ederra pasatu gendun Forun eta Gernika-Lumon.

Hasteko Gernikako tren geltoki ondoko plazatxoan batu ginen 17 pertsona eta handik Forura joan ginen kontu kontari, San Martin elizaraino; eguraldia be ondo portatu jakun, nahiz eta euria iragarrita egoan;  han Jesus Mari abade frantzizkotarrak egin euskun harrera eta eliza azpiko ondare historiko interesgarria erakutsi eta azaldu, erromatarren garaitik hasita garai ezberdinetako aztarnak dagoz bertan eta. 

 Gero erreixo ondotik egin gendun Gernikarako bidea, inguruko padurak ikusiz; han zehar gure taldeko Maribik erakutsi euskuzan inguru hartan zabaldu diren bedar eta zuhaizka hondatzaileak eta lasai lasai iritsi ginen Auzokoa tabernaraino; han alkartu ginen beste guztiekaz eta trago bana hartuaz  jarraitu gendun gure zeresanak trukatzen. Beste taberna bat be bisitatu gendun, baina kalean egoteko be sasoi ona egoanez, batzuk barruan eta beste batzuk taberna aurrean ekin geuntzan mingainari eragiten, umore onean eta gustura.

Bakeleku txoko dotorera ordu bi eta erdiak inguruan heldu ginen eta han ebiltzan gure sukaldari Jon eta Fernando biak entsaladari azken ikutuak emoten; mahaiak ere lauki perfektuan eukezan ipinita, danok aurrez aurre egoteko moduan.

Zutunik eta edalontzi beteak eskuan topa eginez  (Euskeraz bizi ta tinko / hango eta hemendiko / topa dagigun eta bakean / bizi gaitezen betiko) emon geuntsan hasiera bazkariari: entsalada ondo hornitua, makailoa (Pil-pilean eta Bizkaiko erara), errioxar ardaua, pastelak eta kafeak. Guzti honeri, bakoitzak gainezka ekarri eban umore ona eta alkarregaz ondo pasatzeko gogoa gehituz, dana konpleto.

Bazkal ostean lehenengo eta behin bakoitzak bere burua aurkeztu eban besteen aurrean eta ondoren alkarrizketa sakonari ekin geuntzan. Jon Sarasuaren Hiztunpolisa atxakitzat hartuta, gogoeta eta kontu interesgarriak aipatu genduzan:

- Topaguneak garrantzitsuak direnez euskerarentzat eta gu ere topagunea garenez, hau zabaltzen ahalegindu beharko ginateke.
- Patxi Lehendakariari buruzkoak: Idahon “Yo no necesito traductor…” esan ebanekoa; Zamudion “Nik euskera, zuk zergatik ez” kanteu eutsenekoa.

- Eskeraren berrezkurapenean protagonismoa euskeraren aldeko herri mugimenduak eta erakundeek izan behako leukela argi gelditu zan; baina administrazioarekin eta politikoekin kontatu behar dela, diru laguntzak lortzeko eta haiek ere euskeraren alde inplikatzeko. Administrazioak ere hainbat gauza egin dauala euskeraren alde esan eban pertsona batek.

- Euskeraz dakienek erderaz egitearen arrazoiak ere harilkatu ziren apur bat: euskeraz egiteko erreztasun falta; erdera erabiltzea modan egotea... Euskaldun osoa izatearena ere aipatu zan; eta baita euskera erabiltzeko motibazioa eta kontzientzia behar zirela ere. Orduan batek bota eban: euskeraz egiteko kontzientzia behar da ala ohitura?

- Batzuetan gaien arabera hizkuntza bata edo bestea erabiltzen da; esaterako telebista erderaz entzun bada edo lanean erderaz egiten bada, gai horrei buruz erderaz egingo da, nahiz eta beste gai batzuei buruz euskeraz egin.

- Kike Amunarrizen programan Bilbori buruz esandakoa be aipatu zan: Euskal Herrian euskeraz gehien egiten dan herria edo hiria da Bilbo.  Sarritan Bilbora joaten garenean eta ezezagun bateri berba egiterakoan geuk be oker jokatzen dogu, erderaz hasten garelako, eta euskeraz egin ezkero sorpresa atseginak ere hartzen dira, ulertzeko beste jente askok dakielako; esaterako gaur egun Atletikeko jokalarien seitik lauk badakie euskeraz.

- Euskeragaz lotuta joan behar da euskal kultura be eta hori ahaztu egiten dogu sarritan.

Honen ondoren Pilarek topaketa honetarako prestatutako bertsoak abestu genduzan danon artean. Bestalde Mikelek eta Lolik sehaska kantu bat abestu euskuen duora eta Jon Enbeitak bere hiru kantu. Gero, barriro be danon artean, kanteu genduzan gure liburuxkako abesti batzuk. Eta tarteka izan eben bere lekua txisteak eta pasadizoak be.

Beraz, berba eta kanta ugari izan zan gure artean,  umorea, ironia eta seriotasuna txandakatuz; izan gendun giro atsegin eta bete beteak argi erakusten dau Euskeraz Bizi lagunarte biok osasuntsu eta gogotsu dagozala.

Ondoren kontuak egin eta bakoitzak berea ordaindu, eta lagunarte bakoitzak bere hurrengo zita eguna zehaztu ondoren, arratsaldeko 7ak inguruan agurtu gendun alkar.

EUSKARAREN BIRIKAK PUZTEN

Euskararen arnasguneak, euskarak nagusitasuna duen eremuak, indartu asmo ditu Kontseiluak, eta prozesu bat abiarazi du. Babestea ez, lehentasuna arnasguneak hedatzea dela diote. Herritarrak inplikatu nahi dituzte.

Bideo bat egin dute, arnasguneei buruzkoa, eta tailerrak egiten ari dira herriz herri, jendeak gaiari buruzko gogoeta egin dezan eta sakontzeko proposamenak abia ditzan. «Izan ere, indartze bat etorriko da instituzioetatik, baldin eta sozialki bultzatzen bada, eta bai euskalgintzak eta bai eremu euskaltzaleak eragiten badute». Horregatik, tailerren bitartez «kontzientziak pizten» ari dira, jendea «ahalmentzen». «Haiek izan daitezen aldaketen bultzatzaile eta probokatzaile». Tailerra arnasgune diren udalerrietan egiten ari dira. 
Uemaren asmoa da mankomunitatean sartutako udalerri guztietan tailerra ematea, eta jada egin dute hainbat tokitan. Tailerra eremu erdaldunagotako udalerritarako ere «egokitzea» buruan dute orain. Oraingoz egin dituzten tailerretan «sorpresa nahiko ona» hartu dutela dio Salaberriak. «Ekarpen eta proposamen dezente etorri dira», azaldu du. «Esperientzia baikorrak izan dira, eta jarraibidea izateko asmoa dute esperientzia gehienek».
Arnasguneen lanketan sakontze aldera, Kontseilu barruan egiten ari diren lanaz aparte, harremanetan dira Gipuzkoako Foru Aldundiarekin Arnasguneak hedatuz izeneko proiektuan. 

Gehiago: Berria, 2014-urtarrila-7